مصر والبرازيل هنقطعهم النهارده

الناس خايفة من الماتش...كل ما أقول لحد يقولي حنخسر

طب ليه يا جماعة ده الموضوع بسيط خالص

دلوقتي يعني مين أحسن واحد في البرازيل؟

كاكا؟...حنخلي وائل جمعة يمسكوا

داني ألفيس؟...ولا يهمنا...سيد معوض حيعلمه الكورة أساساً

بعدين بقى عندنا حسن شحاتة...مش واحد اسمه دونجا...والتاني الإيطالي اسمه ليبي...يعني هو ليبي وايطالي في نفس الوقت ازاي بس يا اخوانا ده كدة تزوير

يبقى ليبي مزور حيحرموا إيطاليا من البطولة...بس أكيد انها مكانتش تفرق كتير لان إيطاليا دي كان الأهلي بيلاعب بني عبيد<<<منتخبنا هما بني عبيد على فكرة

المهم نرجع لموضوع ماتش البرازيل

السيناريو المتوقع:

حاجة بسيطة خالص...قبل الماتش حتلاقي دونجا نزل يبوس رجل حسن شحاتة عشان مينزلش أبو تريكة ولا محمد زيدان

دونجا حيصعب عالمعلم فحينزله الدكش الصغير...حتة احمد عيد على حتة أبو جريشة والموضوع يمشي

في أول خمس دقايق حتلاقي داني ألفيس - بتاع برشلونة - واقع عالأرض ومش قادر يجاري سيد معوض...وحيحصل كدة بالظبط...الفيس حيمسك سيد من رجله وحيقوله:أبوس رجلك تهمد شوية مش عارفين نلعب

بس على مين...سيد معوض مبيرحمش

وبعد أول جون للمنتخب في الدقيقة عشرة حتلاقي 22 لاعيب برازيلي قاعدين بيتحايلوا على حسن شحاتة يخف اللعب عليهم شوية

حسن شحاتة حيسيب الماتش؟...انسى

المهم لعيبة منتخب مصر طلبت شاي وشيش وريحت والحضري واقف في الجون لوحده ومحدش عارف يجيب فيه جون...مش عشان الحضري بيصد مثلا...لا يا عم...عشان اللعيب كل ما ييحي يشوط الكورة يعطس تروح الكورة ضايعة منه

حسن شحاتة حيصحى من النوم حيلاقي الماتش لسة زي ما هو حيروح منزل أبو تريكة

أبو تريكة أول ما نزل الملعب الجمهور البرازيلي كلهم اغمن عليهم....ولعيبة البرازيل جالها تبول لا ارادي...من الرعب

وحارس البرازيل-سيزار- جاتله حالة عصبية...وبدأ يقول: جالك أبو تريكة يا تارك الصلاة...جالك أبو تريكة يا تارك الصلاة

وديش ديش هوب هوب صحيت من النوم عشان ألاقي منتخبنا خسران 3-0 في أول عشر دقايق....بس مش مهم..هي تيك تيك تيك تيك وحندخل أربع اجوان وحنكسب بإذن الله!!!!!!!!!!!!!!